1. რა არის ტრეფიკინგი?

• დამნაშავე პირების მიერ ადამიანებით ვაჭრობა ფინანსური სარგებლის მიღების მიზნით.

• საქართველოს კანონმდებლობით, ტრეფიკინგი განისაზღვრება, როგორც ადამიანის ყიდვა, გაყიდვა ან მის მიმართ სხვა უკანონო გარიგების განხორციელება.

• ის ასევე მოიცავს ადამიანის გადაბირებას, გადაყვანას, დაქირავებას, ტრანსპორტირებას ან მიღებას ექსპლუატაციის მიზნით.

• ტრეფიკინგი შეიძლება მოხდეს როგორც საქართველოს ფარგლებს გარეთ, ისე საქართველოში.

2. რა მიზნით ხდება ტრეფიკინგი?

ტრეფიკინგის მთავარი მიზანია ექსპლუატაცია. ექსპლუატაციის ძირითადი ფორმებია:

• სექს-ტრეფიკინგი (სექსუალური ექსპლუატაცია)

• იძულებითი შრომა/შრომის ექსპლუატაცია: მსხვერპლის ჩაბმა მომსახურების, წარმოების, სოფლის მეურნეობის ან კრიმინალურ ბიზნესში (მაგ. შეიარაღებული ფორმირება, ნარკოტიკებით ვაჭრობა და სხვა).

• ბიოლოგიური ექსპლუატაცია: ადამიანის გამოყენება ორგანოების ან ქსოვილების გადანერგვისათვის, ან ქალების სუროგატ დედებად გამოყენება.

3. რა მეთოდებს იყენებენ ტრეფიკიორები (ტრეფიკინგის განმახორციელებლები)?

ტრეფიკიორები მსხვერპლის იძულებით მონობასა და იძულებით საქმიანობაში ჩართვისთვის იყენებენ შემდეგ მეთოდებს:

• ძალადობა:

• გაუპატიურება, ცემა, ფიზიკური ზეწოლა

• გადაადგილების შეზღუდვა

• ფიზიკური დატყვევება

• მოტყუება (თაღლითობა):

• არასწორი და შეცდომაში შემყვანი შეთავაზებები სამსახურის, ქორწინებისა და უკეთესი ცხოვრების შესახებ

• ნდობის ბოროტად გამოყენება

• იძულება

• დაშინება სერიოზული ზიანის მიყენებით

• შანტაჟი

• ვალით დაკაბალება (ეკონომიკური ძალადობა)

• პირადობის დამადასტურებელი დოკუმენტების ჩამორთმევა

• მუქარა სამართალდამცავ ორგანოებთან დასმენით

• ანაზღაურების გადაუხდელობა ან მკვეთრად შეზღუდული გადახდა

4. რა მიზეზები აქვს ტრეფიკინგს?

შიდა მიზეზები:

• მძიმე ეკონომიკური პირობები;

• მოსახლეობის ცუდი ინფორმირებულობა საზღვარგარეთ ყოფნის და სამუშაოდ მოწყობაზე, ასევე არალეგალური შრომითმოწყობის შედეგებზე;

• სამართლებრივ ფაქტორებს მიეკუთვნება, ერთ მხრივ, დაზარალებულთა დაცვის სისტემის არარსებობა და, მეორე მხრივ, დამნაშავეთა დაუსჯელობა;

• ფსიქოლოგიური ფაქტორი — მოქალაქეების მოუმზადებლობისა და ახალ, მძიმე პირობებში ყოფნის ფონზე მცირდება თავდაცვის ინსტინქტი, უარესდება ფსიქოლოგიური მდგომარეობა. პრინციპით „უარესი რაღა უნდა დამემართოს“ ადამიანები თანხმდებიან საეჭვო წინადადებებს და ვერ ამჩნევენ საფრთხეს.

გარე მიზეზები:

• საზღვრების გახსნა;

• ტურისტული მოგზაურობის გაადვილება;

• ჩრდილოვანი ეკონომიკის ინტერნაციონალიზაცია;

• მდიდარ და ღარიბ სახელმწიფოებს შორის სხვაობის გაღრმავება;

• საერთაშორისო დანაშაულებრივი ჯგუფების ჩამოყალიბება;

• სახელმწიფო ორგანოებში მომუშავე მოხელეთა კორუმპირებულობა და სხვა.

5. როგორ ისჯება ტრეფიკინგი საქართველოს კანონმდებლობით?

ტრეფიკინგი საქართველოში მძიმე დანაშაულად არის აღიარებული და მასზე გათვალისწინებულია მკაცრი სასჯელი. საქართველოს სისხლის სამართლის კოდექსით ტრეფიკინგი ისჯება:

• ადამიანთა ტრეფიკინგი (მუხლი 143¹): პატიმრობა 7-დან 20 წლამდე.

• ტრეფიკინგი არასრულწლოვანების მიმართ (მუხლი 143²): სასჯელი 8-დან 20 წლამდე.

• ტრეფიკინგის მსხვერპლის მომსახურების გამოყენება (მუხლი 143³): სასჯელი 4-დან 15 წლამდე.

მნიშვნელოვანია, გახსოვდეს, რომ ადამიანით ვაჭრობის მსხვერპლი არ არის დამნაშავე!